A) Helburu orokorrak

1. Proiektuaren helburu orokorra pertsona heldu eta/edo behar bereziak dituztenei eta hauen familiei beren oinarrizko beharrak asetzen laguntzea da. Horretarako, kolektibo honek egunerokoan bizi den gizartearekin dituen harremanak bultzatu nahi dira, eta behar diren laguntzak emango dira beraien bizi kalitatea hobetzeko eta ahal den neurrian instituzio batean sartu behar ez izateko. Bereziki harremanak mantendu eta bultzatzean lan egin nahi dugu, izan ere, badakigu adinak eta gaixotasunak bakardade, isolamendu eta sufrimendu egoerak sortzen dituela, eta ez du inork hori nahi ez bere buruarentzat ez bere hurbileko jendearentzat.
   Horregatik, arreta, sostengu eta akonpainamendu gune bat sortu nahi dugu, bertara datorren jendeak bizi kalitatea mantendu eta hobetu dezan. Aldi berean, taldean eta jende gehiagorekin egoteko aukera egongo da, eta autonomia pertsonal eta sozialeko gaitasunak garatzea ahalbidetuko da.

2. Proiektuak pertsonek behar dituzten beharrak asetzea bultzatuko du, eta horretarako ahalik eta gehien indartuko da zonaldean dauden baliabide komunitarioen erabilera: eskola, museoa, elkarte gastronomikoak… Gainera, gure herri eta inguruetan antolatzen diren ekitaldi eta jardueretan parte hartzea sustatuko da. Kolektibo honek bere inguru sozialen parte hartzea onuragarria izango da ez bakarrik beraientzat, baizik eta gizarte guztiarentzat, izan ere, guztiok ikasi dezakegu elkarrengandik, adibidez, belaunaldi bakoitzaren esperientziak merezi duen onarpena eta errespetua.
   Hortaz gain, denbora librerako aktibitate berriak proposatu nahi ditugu. Jarduera hauekin ilusioa eta motibazioa piztu nahi ditugu, eta pertsona hauen ohizko harreman sareaz gain (gehienetan familia eremura mugatzen dena), laguntasun harreman berriak bultzatuko dira.